Ussnan, d tasɣunt tussnant tagraɣlant i d-yessufuɣ Usemmas n Unadi deg Tutlayt d Yidles n Tmaziɣt, i d-yezgan deg Bgayet, deg tmurt n Lezzayer. Tettak tagnit i usiẓreg n yimagraden ussnanen, snat n tikkal deg useggas, wid yerzan annar amaziɣ s tenfaliyin-is akked taɣulin-is yemgaraden : tutlayt, taɣefutlayt, tasnalmudt n tmaziɣt, taɣerma tamaziɣt, tasekla, tiẓutiwin d tgemmi tamaziɣt, tasniremt, tasuɣelt d usemkel aṭumatiki n tutlayt tamaziɣt.
Ussnan tessumur-d agbur i d-yettwafernen sɣer imazzagen deg taɣult. Tqebbel iḍrisen i yettwarun s tefransist, taɛrabt, akked teglizit, maca tesmenyif tutlayt tamaziɣt. Asiẓreg-ines amesḍisan yettili-d deg-s uḥric n yisental imuta akked wuzzigen i d-yettillin i lmendad n yal asumer am temliliyin tussnanin neɣ asiẓreg n yisental-nniḍen.
Ussnan, s tumert i tetteṭṭef isumar n yimagraden n temɣiwant tussnant, ama d imnadiyen i yesɛan tirmit ama wid ur tt-nesɛi, ama sdaxel ama berra n tmurt n Lezzayer, awi-d kan ad tili tmaziɣt d ammas n unadi-nsen ussnan. Isumar n tezrawin yessefk ad ilin d imaynuten, ad bedden ɣef yilugan n tira takadimit.
Ussnan d tasɣunt i yesɛan taɣara n unekcum ilelli, tessiẓrig war tadrimt, tesɛa asqamu n tɣuri. Tlul-d s lebɣi ameqqran, akken ad terr azal i tmaziɣt d wid yettnadin deg taɣulin-is, ladɣa i yinelmaden n duktura, d adeg n usiẓreg ussnan ara d-yawin ala ibaɣuren.
